Azərbaycan Səhiyyə Nazirliyi "Böyük Qayıdış" proqramı çərçivəsində işğaldan azad olunmuş ərazilərdə 15 may 2026-cı ildə Cəbrayıl şəhərində tibbi-humanitar aksiya keçirib.
Nazirliyin Elmi-Tədqiqat Mamalıq və Ginekologiya İnstitutunun altı mama-ginekoloq, bir ultrasəs həkimi, bir neonataloq, bir mama və bir tibb bacısından ibarət heyəti bölgə sakinlərinə konsultativ və profilaktik xidmətlər göstərib.
Aksiya zamanı qadınlar üçün ginekoloji müayinələr aparılıb, reproduktiv sağlamlıq, hamiləlik planlaşdırması, sonsuzluq, hormonal dəyişikliklər və hamiləlik nəzarəti mövzularında konsultasiyalar verilib. Ultrasəs müayinələri ilə sağlamlıq göstəriciləri qiymətləndirilib, fərdi tibbi tövsiyələr təqdim olunub.
Səyyar xidmət uşaqları da əhatə edib: neonataloq tərəfindən müayinə olunan körpə və uşaqların sağlamlıq vəziyyəti dəyərləndirilib. Valideynlərə düzgün qidalanma, erkən inkişaf, immunitet və mütəmadi nəzarətin əhəmiyyəti izah edilib.
Ümumilikdə 120 nəfər müayinədən keçib. Həkimlər ana-uşaq sağlamlığı, xəstəliklərin erkən aşkarlanması, profilaktik müayinələr və sağlam həyat tərzini vurğulayıblar.
Bu aksiyalar regionlarda yaşayan vətəndaşların ixtisaslaşmış tibbi xidmətlərə çıxışını genişləndirir, qadın və uşaq sağlamlığını qoruyur.
